с. Усть-Нем

Мунісны косьӧ вокъяс…

Кулӧмдін районса Немдінысь мужичӧй рӧдысь унаӧн усины кольӧм Ыджыд войнаын. Эз бергӧдчыны гортаныс и Тимушевъяслӧн семьяысь нёль вок: Роман, Фёдор, Василий, Степан.

Войнаӧдз на Степан Тимушев уджыштӧма Кулӧмдін районса Пивью посёлокын поштаса начальникӧн. Сэсся морттӧ босьтӧмаӧсь служитны Гöрд армияӧ. Служитӧма 32-ӧд стрелкöвöй дивизияын, кыптӧма старшöй лейтенантӧдз. Война пансьӧм бӧрын Степанӧс индӧмаӧсь веськӧдлыны ротаӧн. Ёртъяслӧн казьтылӧм серти, тайӧ вӧлӧма тӧлка да ыджыд сьӧлӧма морт. Абу повлӧма кыпӧдны атакаӧ салдатъясӧс, ачыс медводз уськӧдчывлӧма рукопашнöй косьӧ. Степан Тимушев повтӧма нӧйтӧма вӧрӧгӧс Рытыввыв Белоруссияын. Но дженьыд вӧлӧма коми мортлӧн олӧмыс. 1941 вося октябрь 8 лунӧ Степан Тимушев ранитчӧма да кулӧма госпитальын. Кувсьӧм бӧрас некымын вежон мысти гортас воӧма «сьӧд» юӧрыд. Ок и бӧрдӧмаӧсь жӧ гортсаясыд Степанӧс казьтылігӧн.

Роман Тимушев чужлӧма 1920 воын. Гöрд армияӧ босьтлӧмаӧсь 1940 воын. Служитӧма 3-ӧд стрелкöвöй дивизияын. Вӧлӧма прöстöй салдатӧн. Усьӧма 1941 вося июль 17 лунӧ Витебск дорын. Сэтчӧ сійӧс и дзебӧмаӧсь братскöй гуӧ.

Нӧшта ӧти вок Фёдор Тимушевӧс босьтӧмаӧсь фронт вылӧ 1941 вося октябрын. Вӧлӧма артиллеристӧн, воюйтӧма 983-ӧд стрелкöвöй полкса артдивизионын. Наградитӧмаӧсь Гöрд Звезда орденӧн. Ыджыд вермӧмӧдз эз жӧ ов, пуктӧма юрсӧ 1944 вося январын Белоруссияса Гомель обласьт мездігӧн.

Василий Тимушев став вок пӧвстас вӧлӧма медічӧтӧн. Чужлӧма 1924 воын. Школа бӧрын велӧдчӧма 6-ӧд номера ремесленнöй училищеын. Специальносьт босьтӧм бӧрын мыйтакӧ кад уджалыштӧма столярӧн Сыктывкарса речнöй портын. А 1942 вося январсянь — Гöрд армияын. Салдат Василий Тимушев сетіс ловсӧ Айму вӧсна тышын 1943 вося март 4 лунӧ. Сылы сэки вӧлӧма 19 арӧс.

…Немдін сикт шӧрын сулалӧ Великöй Отечественнöй войнаын усьӧмаяслы памятник. Сэні гижӧма и Тимушев вокъяслысь нимъяссӧ. Некор оз вунӧдны землякъяс ассьыныс бур пиянсӧ, кодъяс сетісны  ловнысӧ чужан му вӧсна…

Иван ШЕШУКОВ.

Коми му, 2005, Октябр 22 лун.

 © Усть-Куломская межпоселенческая библиотека